اسلام آباد (نیوز ڈیسک )حکومت پیٹرولیم مصنوعات کی قیمتوں کے تعین کے موجودہ طریقہ کار میں بڑی تبدیلی پر غور کر رہی ہے،

جس کے تحت مستقبل میں ایندھن کی قیمتیں روزانہ کی بنیاد پر مقرر کی جا سکتی ہیں۔ذرائع کے مطابق مجوزہ نظام نافذ ہونے کی صورت میں آئل اینڈ گیس ریگولیٹری اتھارٹی (اوگرا) کو پیٹرولیم مصنوعات کی قیمتوں کے تعین کا مرکزی اختیار حاصل ہوگا، جبکہ قیمتوں کے تعین میں حکومت کا براہِ راست کردار پہلے کے مقابلے میں محدود ہو جائے گا۔پیٹرولیم ڈویژن کے ایک اعلیٰ عہدیدار کے مطابق نئے طریقہ کار کے تحت اوگرا ہر رات موٹر اسپرٹ (پیٹرول)، ہائی اسپیڈ ڈیزل، لائٹ ڈیزل آئل اور مٹی کے تیل کی نئی قیمتوں کا جائزہ لے کر ان کا اعلان کرے گی۔

ذرائع کا کہنا ہے کہ اگر یہ منصوبہ منظور ہو جاتا ہے تو روزانہ مقرر کی جانے والی نئی قیمتیں رات 12 بجے سے نافذ العمل ہوں گی، جس کے نتیجے میں پیٹرولیم مصنوعات کی قیمتیں عالمی مارکیٹ کے اتار چڑھاؤ کے مطابق زیادہ تیزی سے ایڈجسٹ کی جا سکیں گی۔