مکو آ نہ (این این آئی)ملک میں گندم اور آٹے کی قیمتوں میں اضافے کے اثرات روٹی اور نان کی قیمتوں پر بھی پڑنے لگے ہیں،

جبکہ مختلف شہروں میں تندور مالکان نے سرکاری نرخوں کو نظر انداز کرتے ہوئے قیمتوں میں اضافہ کرنا شروع کر دیا ہے۔پاکستان کے تیسرے بڑے شہر فیصل آباد میں گندم اور آٹے کی بڑھتی قیمتوں کو جواز بناتے ہوئے نان بائی ایسوسی ایشن نے پہلے روٹی کی قیمت 13 روپے سے بڑھا کر 15 روپے اور نان 25 روپے میں فروخت کرنے کا اعلان کیا تھا، تاہم انتظامیہ کی جانب سے اس پر مؤثر کارروائی سامنے نہیں آئی۔اب متحدہ نان بائی ایسوسی ایشن نے ایک بار پھر قیمتوں میں اضافے کا اعلان کرتے ہوئے کہا ہے کہ 20 کلو آٹے کی قیمت 2 ہزار 400 روپے اور میدے کی قیمت 12 ہزار روپے تک پہنچنے کے باعث سادہ روٹی 20 روپے جبکہ نان 30 روپے میں فروخت کیا جائے گا۔

ایسوسی ایشن کے رہنماؤں کا کہنا ہے کہ مہنگے آٹے، ایل پی جی، شاپر بیگز اور دیگر اخراجات کے باعث سرکاری نرخ پر 15 روپے کی روٹی فروخت کرنا ممکن نہیں رہا۔ ان کا مطالبہ ہے کہ حکومت تین روز کے اندر مذاکرات کرے، بصورت دیگر احتجاجاً تندور بند کر دیے جائیں گے۔