لاہور( این این آئی)اسٹیٹ بینک نے ساڑھے چار سال بعد سوہنی دھرتی ریمیٹنس اسکیم ختم کرنے کا فیصلہ کر لیا اوراس حوالے سے اسٹیٹ بینک نے بینکوں اور ایکسچینج کمپنیوں کو باقاعدہ سرکلر بھی جاری کر دیا ہے۔
دوسری جانب ایکسچینج کمپنیز ایسوسی ایشن کے چیئرمین ملک بوستان نے کہا ہے کہ یہ سکیم عالمی مالیاتی ادارے کے دبا ئوپر ختم کی گئی۔سکیم کے تحت قانونی بینکنگ چینلز کے ذریعے ترسیلات زر بھیجنے والے اوورسیز پاکستانیوں کو انعامی پوائنٹس دئیے جاتے تھے جنہیں ٹیکس اور مختلف سرکاری فیسوں کی ادائیگی میں استعمال کیا جا سکتا تھا جس سے لاکھوں پاکستانیوں کو فائدہ پہنچتا تھا۔
ملک بوستان نے کہا کہ سوہنی دھرتی ریمیٹنس اسکیم ختم نہیں ہونی چاہیے تھی کیونکہ اس سے بیرون ملک مقیم پاکستانیوں میں بینکنگ چینلز کے ذریعے ترسیلات زر بھیجنے کا رجحان نمایاں طور پر بڑھا تھا۔اس سکیم پر آنے والی لاگت بھیجی گئی ترسیلات کی مجموعی مالیت کا صرف ایک سے ڈیڑھ فیصد تھی جو اس کے فوائد کے مقابلے میں بہت کم تھی۔
