اسلام آباد (نیوز ڈیسک) پیٹرولیم مصنوعات کی قیمتوں میں بار بار ہونے والے ردوبدل کے اثرات کم کرنے کے لیے وفاقی حکومت نے پیٹرولیم پرائسز سٹیبلائزیشن فنڈ کے قیام کا باضابطہ اعلان کر دیا ہے۔
وزارتِ خزانہ کی جانب سے جاری کیے گئے نوٹیفکیشن میں متعلقہ وفاقی اور صوبائی اداروں کو اس فنڈ کے قیام اور انتظامی امور سے آگاہ کر دیا گیا ہے۔ حکومت نے اس مقصد کے لیے ایک مخصوص سرکاری اکاؤنٹ بھی مختص کر دیا ہے۔
اعلامیے کے مطابق فنڈ میں جمع ہونے والی تمام رقوم وفاقی حکومت کے پبلک اکاؤنٹ میں منتقل کی جائیں گی، جبکہ اس کے لیے علیحدہ اکاؤنٹ ہیڈ اور آبجیکٹ کوڈ بھی جاری کر دیا گیا ہے تاکہ مالی لین دین شفاف انداز میں انجام دیا جا سکے۔
اس حوالے سے آڈیٹر جنرل پاکستان، کنٹرولر جنرل آف اکاؤنٹس، اکاؤنٹنٹ جنرل آف پاکستان ریونیو سمیت چاروں صوبوں کے اکاؤنٹنٹ جنرلز کو بھی باقاعدہ طور پر مطلع کر دیا گیا ہے۔ ساتھ ہی صوبائی حکومتوں کو فنڈ سے متعلق وصولیوں اور دیگر انتظامات مکمل کرنے کی ہدایات بھی جاری کی گئی ہیں۔
حکومت کے مطابق اس فنڈ کے طریقۂ کار اور ضوابط کی تیاری وزارتِ خزانہ، پیٹرولیم ڈویژن اور آئل اینڈ گیس ریگولیٹری اتھارٹی (اوگرا) مشترکہ طور پر کریں گے۔
مزید یہ کہ پیٹرولیم مصنوعات کی قیمتوں میں استحکام برقرار رکھنے کے لیے قانونی اور مالیاتی فریم ورک بھی الگ سے مرتب کیا جائے گا، جس کی منظوری متعلقہ فورمز سے حاصل کی جائے گی۔
