اسلام آباد (نیوز ڈ یسک) پاکستان میں پہلی بار بڑی تجارتی گاڑیوں کی درآمدات نے نئی بلندیاں چھو لیں۔
اسٹیٹ بینک آف پاکستان کے تازہ اعداد و شمار کے مطابق رواں مالی سال 2025-26 کے ابتدائی گیارہ ماہ کے دوران بسوں اور ٹرکوں کی درآمدات 26 کروڑ 24 لاکھ ڈالر تک پہنچ گئیں۔اعداد و شمار کے مطابق گزشتہ مالی سال کے اسی عرصے میں یہ درآمدات صرف 5 کروڑ 78 لاکھ ڈالر ریکارڈ کی گئی تھیں، جس کے مقابلے میں موجودہ سال نمایاں اضافہ دیکھنے میں آیا ہے۔اسٹیٹ بینک کی رپورٹ میں بتایا گیا ہے کہ بھاری ٹرانسپورٹ کی زیادہ تر درآمدات مکمل تیار شدہ یونٹس کی صورت میں کی گئیں۔ ماہرین کے مطابق شرح سود میں کمی، حکومتی سہولتوں اور ٹرانسپورٹ سیکٹر کے لیے متعارف کرائی گئی
مراعات نے اس شعبے میں درآمدات کو ریکارڈ سطح تک پہنچانے میں اہم کردار ادا کیا ہے۔معاشی تجزیہ کاروں کا کہنا ہے کہ تجارتی سرگرمیوں میں اضافے، لاجسٹکس کے شعبے کی توسیع اور مال برداری کے نظام کو جدید بنانے کے رجحان نے بھی بھاری گاڑیوں کی طلب میں نمایاں اضافہ کیا ہے۔
