اسلام آباد (نیوز ڈیسک) متحدہ عرب امارات نے جون 2026 کے لیے پیٹرولیم مصنوعات کی نئی قیمتوں کا اعلان کر دیا ہے،

جو یکم جون سے نافذ العمل ہوں گی۔ عالمی سطح پر خام تیل کی قیمتوں میں اضافے کے اثرات کے باعث یو اے ای میں ایندھن مسلسل تیسرے ماہ مہنگا کیا گیا ہے۔جاری کردہ نرخوں کے مطابق سپر 98 پیٹرول کی قیمت بڑھا کر 3.95 درہم فی لیٹر مقرر کر دی گئی ہے، جبکہ گزشتہ ماہ یہ 3.66 درہم فی لیٹر فروخت ہو رہا تھا۔اسی طرح اسپیشل 95 پیٹرول کی نئی قیمت 3.83 درہم فی لیٹر مقرر کی گئی ہے، جو مئی میں 3.55 درہم فی لیٹر تھی۔ ای پلس 91 پیٹرول بھی مہنگا ہو گیا ہے اور اس کی قیمت 3.48 درہم سے بڑھ کر 3.76 درہم فی لیٹر کر دی گئی ہے۔دوسری جانب ڈیزل کے نرخوں میں کمی کی گئی ہے۔

نئے شیڈول کے تحت ڈیزل 4.69 درہم کے بجائے 4.33 درہم فی لیٹر دستیاب ہوگا۔ماہرین کے مطابق عالمی منڈی میں خام تیل کی قیمتوں میں اتار چڑھاؤ کے باعث خلیجی ممالک میں ایندھن کی قیمتوں پر مسلسل اثرات مرتب ہو رہے ہیں، جس کے نتیجے میں یو اے ای نے بھی جون کے لیے نئی قیمتوں کا اطلاق کر دیا ہے۔