اسلام آباد (نیوز ڈیسک) لاہور الیکٹرک سپلائی کمپنی (لیسکو) نے صارفین کے لیے پری پیڈ بجلی میٹر متعارف کروانے کا فیصلہ کیا ہے، جس کے تحت صارفین پیشگی رقم ادا کر کے بجلی استعمال کر سکیں گے۔
لیسکو کے چیف انجینئر محمد رمضان بٹ نے بتایا کہ اس نظام میں موبائل فون کی طرح بیلنس لوڈ کیا جائے گا، اور جتنا بیلنس ہوگا اسی حساب سے بجلی فراہم کی جائے گی۔ انہوں نے کہا کہ صارفین اپنی ضرورت کے مطابق بجلی استعمال کر سکیں گے، چاہے وہ کم وقت میں بیلنس ختم کریں یا اسے پورے مہینے تک چلائیں۔
ان کا کہنا تھا کہ اس منصوبے کا ابتدائی مرحلہ پائلٹ بنیادوں پر شروع کیا گیا ہے، جس کے تحت علامہ اقبال ٹاؤن میں دو میٹرز نصب کر کے آزمائش کی جا رہی ہے۔
چیف انجینئر نے مزید بتایا کہ اوور بلنگ کے مسائل کے حل کے لیے بھی اقدامات کیے جا رہے ہیں، جبکہ صارفین کی سہولت کے لیے بعض خدمات کو آؤٹ سورس کرنے پر بھی کام جاری ہے۔
