اسلام آباد(نیوز ڈیسک)بین الاقوامی منڈی میں خام تیل کی قیمتوں میں کمی کا رجحان برقرار ہے۔

برینٹ کروڈ کی قیمت گھٹ کر 68 ڈالر 79 سینٹ فی بیرل ہو گئی، جبکہ امریکی ویسٹ ٹیکساس انٹرمیڈیٹ (ڈبلیو ٹی آئی) بھی کم ہو کر 64 ڈالر 13 سینٹ فی بیرل پر آ گیا۔عالمی توانائی مارکیٹ میں غیر یقینی صورتحال کے دوران بھارت کی سرکاری کمپنی انڈین آئل کارپوریشن نے روس سے تیل کی درآمد عارضی طور پر روک دی ہے۔ ذرائع کا کہنا ہے کہ کمپنی نے روسی سپلائی کے متبادل کے طور پر مغربی افریقہ اور مشرقِ وسطیٰ سے تقریباً 60 لاکھ بیرل خام تیل خرید لیا ہے۔ دوسری جانب یورپی یونین نے بھی روسی تیل پر عائد پابندیوں میں مزید سختی کر دی ہے، جس سے عالمی توانائی کی منڈی پر اثرات مرتب ہونے کا امکان ظاہر کیا جا رہا ہے۔ ماہرین کے مطابق عالمی سیاسی و معاشی حالات کے باعث آنے والے دنوں میں تیل کی قیمتوں میں مزید اتار چڑھاؤ دیکھنے کو مل سکتا ہے۔ادھر قیمتی دھاتوں کی عالمی قیمتوں میں بھی نمایاں کمی ریکارڈ کی گئی ہے۔ سونے کی قدر میں تقریباً ایک فیصد کمی کے بعد فی اونس قیمت 5 ہزار 16 ڈالر رہ گئی، جبکہ چاندی 2.5 فیصد سستی ہو کر 81 ڈالر 31 سینٹ فی اونس پر آ گئی۔ یاد رہے کہ 29 جنوری کو سونا 5 ہزار 594 ڈالر فی اونس اور چاندی 121 ڈالر فی اونس تک پہنچ گئی تھی، تاہم حالیہ دنوں میں سرمایہ کاروں کے محتاط رویے اور عالمی معاشی دباؤ کے باعث قیمتوں میں کمی دیکھی جا رہی ہے۔

پلاٹینم بھی 1.6 فیصد کمی کے بعد 2 ہزار 88 ڈالر فی اونس پر آ گیا، جبکہ پلاڈیم کی قیمت گھٹ کر ایک ہزار 710 ڈالر فی اونس ہو گئی ہے۔