اسلام آبا د (نیوز ڈیسک ) ایپل کے بارے میں قیاس آرائیاں سامنے آ رہی ہیں کہ کمپنی فروری 2026 میں اپنا سب سے کم قیمت نیا ماڈل،

آئی فون 17 ای، متعارف کرا سکتی ہے، جس کی ممکنہ قیمت بھی منظرِ عام پر آ گئی ہے۔بلومبرگ کی رپورٹ کے مطابق ایپل 19 فروری کو آئی فون 17 ای پیش کر سکتا ہے، جو گزشتہ برس لانچ کیے گئے آئی فون 16 ای کی جگہ لے گا۔ رپورٹ میں بتایا گیا ہے کہ نئے ماڈل کی متوقع قیمت 599 ڈالر رکھی جائے گی، جو کہ آئی فون 16 ای کی ابتدائی قیمت کے برابر ہے۔حالیہ مہینوں میں ریم چِپس کی کمی کے باعث یہ خدشہ ظاہر کیا جا رہا تھا کہ ایپل نئے ماڈل کی قیمت بڑھا سکتا ہے، تاہم دستیاب معلومات کے مطابق کمپنی قیمت کو برقرار رکھنے کا ارادہ رکھتی ہے۔فیچرز کے حوالے سے بتایا جا رہا ہے کہ آئی فون 17 ای مجموعی طور پر آئی فون 16 ای سے زیادہ مختلف نہیں ہوگا۔ نمایاں تبدیلیوں میں نیا اے 19 چِپ سیٹ شامل ہوگا، جبکہ پچھلے ماڈل میں اے 18 پروسیسر دیا گیا تھا۔ اس کے علاوہ میگ سیف سپورٹ بھی نئے فون کا حصہ بننے کا امکان ہے۔

ماہرین کے مطابق چونکہ آئی فون 17 ای میں بڑی سطح کی اپ گریڈز متوقع نہیں، اسی لیے ایپل کے لیے قیمت کو پہلے جیسا رکھنا ممکن ہو سکا ہے۔ تاہم یہ بات قابلِ ذکر ہے کہ ایپل نے تاحال آئی فون 17 ای کے بارے میں کوئی سرکاری اعلان نہیں کیا، اس لیے 19 فروری کو لانچ سے متعلق معلومات کی حتمی تصدیق نہیں ہو سکی۔