اسلام آباد (نیوز ڈیسک) وزیراعظم شہباز شریف کی ہدایات کی روشنی میں یوٹیلیٹی اسٹورز کے ملازمین کے لیے خصوصی مالی پیکج کی منظوری دے دی گئی ہے۔

ذرائع کے مطابق وزیراعظم کے معاونِ خصوصی ہارون اختر نے یوٹیلیٹی اسٹورز کے ملازمین سے ملاقات کی، جس کے دوران یوٹیلیٹی اسٹورز کارپوریشن اور نیشنل ورکرز یونین کے درمیان باقاعدہ معاہدہ طے پا گیا۔ہارون اختر کا کہنا تھا کہ معاہدے کے تحت متاثرہ ملازمین کو علیحدگی اور مالی معاوضے پر مشتمل پیکج فراہم کیا جا رہا ہے، جبکہ معاہدے کے بعد اہل ملازمین میں چیکس کی تقسیم کا عمل بھی شروع کر دیا گیا ہے۔انہوں نے وضاحت کی کہ حکومت اس ضمن میں مالی معاونت فراہم کرے گی تاکہ ادائیگیوں کا عمل بروقت مکمل ہو سکے۔ پیکج کے تحت رقم کی ادائیگی مرحلہ وار کی جائے گی، جس میں پہلے مرحلے میں 40 فیصد اور بعد ازاں دو مراحل میں 30، 30 فیصد رقم ادا کی جائے گی۔

معاونِ خصوصی نے کہا کہ یہ اقدام وزیراعظم کے وژن کے مطابق محنت کشوں کے حقوق کے تحفظ اور ان کی فلاح و بہبود کو یقینی بنانے کے لیے کیا جا رہا ہے۔