چارسدہ(این این آئی)چارسدہ کے ڈی ایچ کیو ہسپتال کے فیڈر سے ماہانہ 30لاکھ روپے کی بجلی چوری کا انکشاف ہوا ہے۔ایکسین پیسکو قاضی فہیم نے پریس کانفرنس میں الزام لگایا اور دعویٰ کیا کہ چارسدہ میں پولیس اور انتظامیہ کے افسران اسپتال کے اسپیشل فیڈر سے بجلی چوری کر رہے تھے۔پیسکو افسر نے کہا کہ 7گھر ماہانہ 30لاکھ روپے کی بجلی چوری کر رہے تھے، جن کے کنکشن کاٹ دئیے گئے ہیں۔

ایکسین پیسکو نے کہا کہ خطرناک صورتحال اس وقت سامنے آئی جب بجلی منقطع کرنے کے عمل میں پی ایم ٹی والا کھمبا ہی نیچے جاگرا، بجلی کاٹنے والا پیسکو اہلکار خوش قسمتی سے محفوظ رہا۔پیسکو افسر نے کہا کہ دوسرے فیڈر کے کنکشن پر میٹرز موجود ہیں لیکن ریڈنگ لینے نہیں دی جاتی، پولیس حکام اور انتظامیہ کے افسران پر لاکھوں روپے کے بل بقایاجات ہیں۔ایکسین پیسکو نے کہا کہ چیف سیکریٹری اور پیسکو حکام کو صورت حال سے آگاہ کیا جائے گا۔