اسلام آباد (نیوز ڈیسک) امریکا نے افرادی قوت کی کمی کو مدنظر رکھتے ہوئے ستمبر کے آخر تک تقریباً 65 ہزار اضافی ایچ ٹو بی عارضی گیسٹ ورکر ویزے جاری کرنے کا فیصلہ کیا ہے۔

غیر ملکی خبر رساں ادارے کے مطابق یہ ویزے ان امریکی کمپنیوں کو فراہم کیے جائیں گے جو مقامی کارکنوں کی قلت کے باعث شدید مالی دباؤ کا شکار ہیں۔ اس فیصلے کے نتیجے میں ایچ ٹو بی موسمی گیسٹ ورکر ویزوں کی مجموعی تعداد میں نمایاں اضافہ ہوگا، جس سے سالانہ کوٹہ تقریباً دوگنا ہو جائے گا۔اس اقدام سے تعمیراتی شعبے، ہوٹل و ریسٹورنٹ انڈسٹری، لینڈ اسکیپنگ اور سی فوڈ پروسیسنگ جیسے شعبوں کو خاص طور پر فائدہ پہنچنے کی توقع ہے، جہاں طویل عرصے سے مزدوروں کی کمی ایک بڑا مسئلہ بنی ہوئی ہے۔امریکا میں موسمی کاروبار سے وابستہ ادارے، بالخصوص ہوٹلنگ سیکٹر، کافی عرصے سے اضافی ویزوں کے اجرا کا مطالبہ کر رہے تھے، جبکہ متعدد تعمیراتی کمپنیوں نے سخت امیگریشن پالیسیوں کے باعث لیبر کی کمی پر تشویش ظاہر کی تھی۔

واضح رہے کہ صدر ڈونلڈ ٹرمپ نے 2025 میں عہدہ سنبھالنے کے بعد امیگریشن کے حوالے سے سخت پالیسیوں پر عملدرآمد شروع کیا تھا، تاہم کاروباری حلقوں کے دباؤ کے باعث حکومت کو بعض شعبوں کے لیے اضافی ویزوں کی منظوری دینا پڑی۔