اسلام آباد (این این آئی)درآمدی لگژری گاڑیوں پر انڈر انوائسنگ اور ٹیکس چوری روکنے کیلئے ایف بی آر نے درآمد شدہ گاڑیوں کی قیمت کا اندازہ لگانے میں مقامی مجاز ایجنٹس کا کردار ختم کردیا،اب گاڑی کی اصل قیمت متعلقہ مینوفیکچرنگ کمپنی سیسرٹیفائیڈ ہوگی۔
نجی ٹی وی کے مطابق فیڈرل بورڈ آف ریونیو نے ترمیمی کسٹمز جنرل آرڈر جاری کردیا جس کے تحت مقامی ایجنٹس سے سرٹیفکیٹ لینے یا انہیں فیس دینے کی ضرورت نہیں رہے گی۔ایف بی آر حکام کے مطابق نئے احکامات سے پہلے مجاز ایجنٹس یا ڈیلرز گاڑی کی قیمت کا سرٹیفکیٹ دیتے تھے، جس کی بنیاد پر امپورٹر فیس ادا کرتے تھے، اسی قیمت پر کسٹمز ڈیوٹی اورٹیکس وغیرہ لگائے جاتے تھے۔ایف بی آر کے نئے اقدام کے تحت کمپنی کی آفیشل قیمت کی بنیاد پر ٹیکس وصولی سے شفافیت بڑھے گی، امپورٹرز کو مقامی ڈیلرز کے پاس جانے اور اضافی فیس دینے سے نجات ملے گی،خاص طورپر یورپی لگڑری یا بڑی استعمال شدہ درآمدی گاڑیوں پر اثر پڑے گا۔
