اسلام آباد (نیوز ڈیسک)عدالت نے سبزیوں، پھلوں اور دیگر اشیائے خورونوش کی فروخت کے لیے لاؤڈ اسپیکر استعمال کرنے پر پابندی عائد کرتے ہوئے خلاف ورزی کرنے والوں کے خلاف مقدمات درج کرنے کا حکم جاری کر دیا ہے۔ایکسپریس نیوز کے مطابق راولپنڈی کی ایک ماتحت عدالت میں گلی محلوں میں لاؤڈ اسپیکر کے ذریعے اشیاء فروخت کرنے والوں کے خلاف دائر درخواست پر سماعت ہوئی۔ سماعت کے دوران ایڈیشنل سیشن جج مقصود قریشی نے معاملے کا ازخود نوٹس لیتے ہوئے سینئر وکیل انوار ڈار کی درخواست منظور کر لی۔عدالت نے حکم دیا کہ رہائشی علاقوں میں لاؤڈ اسپیکر کے ذریعے سبزیاں، پھل یا دیگر سامان فروخت کرنے والوں کے خلاف قانونی کارروائی کی جائے اور ان پر مقدمات درج کیے جائیں۔

درخواست گزار کے مطابق ہاکرز صبح سویرے سے رات گئے تک گلیوں میں لاؤڈ اسپیکر کے ذریعے آوازیں لگا کر اشیاء فروخت کرتے ہیں، حالانکہ حکومتی احکامات کے تحت لاؤڈ اسپیکر کے استعمال پر پابندی عائد ہے۔ ان کا کہنا تھا کہ مسلسل شور کے باعث شہریوں کی نیند متاثر ہوتی ہے اور لوگ ذہنی و جسمانی پریشانی کا شکار ہو رہے ہیں۔عدالت نے ان دلائل سے اتفاق کرتے ہوئے گلی محلوں میں لاؤڈ اسپیکر کے استعمال کے ساتھ دکانداری پر مکمل پابندی عائد کرنے کا حکم دے دیا۔