اسلام آباد (این این آئی)رواں مالی سال کی پہلی ششماہی (جولائی تا دسمبر) کے دوران ملکی تجارت کو بڑا دھچکا لگا، جب بڑے شعبوں کی برآمدات میں نمایاں کمی دیکھی گئی۔سرکاری دستاویز کے مطابق غذائی اجناس کی برآمدات میں 40.29 فیصدکمی ریکارڈکی گئی،جبکہ ٹیکسٹائل برآمدات میں معمولی اضافہ ہوا،ششماہی میں غذائی اجناس کی برآمدات کا حجم 2 ارب 36 کروڑ ڈالر رہا،جبکہ گزشتہ مالی سال کی پہلی ششماہی میں یہ تقریباً 4 ارب ڈالرتھا۔دستاویز کے مطابق چاول کی برآمدات میں 49.90 فیصد کمی آئی۔

سبزیوں کی برآمدات میں 36.80 فیصد کمی دیکھی گئی،مقامی خشک میوہ جات کی برآمدات میں 63.78 فیصدتک کمی ریکارڈکی گئی،پلاسٹک کے سامان کی برآمدات میں 43.66 فیصدکمی ہوئی،فارماسیوٹیکل مصنوعات کی برآمدات میں 28.67 فیصد کمی ریکارڈ کی گئی۔ٹرانسپورٹ سامان کی برآمدات میں 36.51 فیصد کمی دیکھی گئی،صرف ٹیکسٹائل برآمدات میں معمولی اضافہ ہوا اور اس کا حجم ششماہی میں 9 ارب 16 کروڑ ڈالر ریکارڈ کیا گیا۔