اسلام آباد(این این آئی)پاکستان نے 2027تک 45ایل این جی کارگوز کی خریداری منسوخ کر دی۔ذرائع پیٹرولیم ڈویژن کے مطابق پاکستان نے قطر سے 24اور اٹلی سے ایل این جی کے 21کارگوز کی خریداری منسوخ کی، قطر سے 2026میں درآمد کیے جانے والیایل این جی کارگوز میں سے 24منسوخ کیے گئے۔اٹلی کی کمپنی سے 2026میں 12کی بجائے صرف ایک ایل این جی کارگو درآمد کیا جائے گا۔ذرائع پیٹرولیم ڈویژن کے مطابق اٹلی کی کمپنی سے درآمد کیا جانے والا واحد ایل این جی کارگو جنوری 2026میں آئے گا، 2027میں اٹلی کی کمپنی سے خریدے جانے والے 12میں سے 10کارگوز منسوخ کردئیے گئے۔
ذرائع کے مطابق پاکستان کے قطر اور اٹلی کی کمپنی سے ایل این جی خریداری کے طویل مدتی معاہدے ہیں، یہ منسوخی ایل این جی خریداری کے طویل معاہدوں کے تحت آنے والے کارگوز کے لیے کی گئی۔ذرائع کے مطابق متعلقہ عالمی کمپنیوں کے ایل این جی کارگوز کی منسوخی کا عمل مکمل ہو چکا ہے۔اٹلی کی کمپنی کا پاکستان ایل این جی لمیٹڈ کے ساتھ کارگوز سپلائی کا 15سال کامعاہدہ ہے، قطر کی کمپنی کا ایل این جی کارگوز کی فراہمی کا پی ایس او کے ساتھ طویل مدتی معاہدہ ہے، پاکستان طویل مدتی معاہدوں کے تحت ہر ماہ 10ایل این جی کارگوز درآمد کرتا ہے۔
