اسلام آباد (این این آئی)پاکستانیوں کا ڈیٹا بیچنے کے دھندے میں 139پلیٹ فارم ملوث نکلے ،این سی سی آئی اے کی تفتیشی ٹیم نے تمام پلیٹ فارمز کی نشاندہی کرلی۔ذرائع کے مطابق ڈیٹا فروخت میں ویب سائٹس، ایپلی کیشنز اور سوشل میڈیا اکائونٹس ملوث ہیں، 18موبائل ایپس، 17ویب سائٹس اور 2یوٹیوب چینلز کا پتا لگا لیا گیا، 75فیس بک، 10انسٹاگرام، 12 ٹیلی گرام اور 10 ٹک ٹاک اکائونٹس بھی شامل ہیں۔

ذرائع کے مطابق پاکستانیوں کا حساس ڈیٹا ایک واٹس ایپ گروپ کے ذریعے بھی بیچا جا رہا تھا، تفتیشی ٹیم کی سفارش پر پی ٹی اے نے تمام پلیٹ فارمز کو بلاک کر دیا۔ذرائع کے مطابق دوسرے مرحلے میں مقدمات درج کرکے ذمہ داروں کی گرفتاریاں کی جائیں گی، گرفتار افراد سے حساس ڈیٹا حاصل کرنے کی تفتیش کی جائے گی۔ذرائع کے مطابق ڈیٹا بیچنے کا دعوی کرنیوالے کئی پلیٹ فارمز کے دعوے جھوٹ بھی نکلے، جرائم پیشہ عناصر متعدد پلیٹ فارمز پر پیسے لینے کے باوجود جعلی ڈیٹا دینے میں بھی مصروف رہے۔