اسلام آباد(اے پی پی)معروف کارساز کمپنی رینالٹ 2018ء تک پاکستان میں کاروں کی اسمبلنگ شروع کردے گی، رینالٹ نے وزیر اعظم محمد نواز شریف کے ویژن کی روشنی میں وزیر خزانہ اسحاق ڈار اور چیئرمین سرمایہ کاری بورڈ ڈاکٹر مفتاح اسماعیل کی کوششوں کے نتیجہ میں پاکستان میں سرمایہ کاری کرنے کا فیصلہ کیا ہے۔جاری اعلامیہ کے مطابق کابینہ کی اقتصادی رابطہ کمیٹی نے آٹو پالیسی پر نظر ثانی کرنے اور ملک میں آٹو کے شعبہ میں وسعت، سرمایہ کاری اور صارفین کے تحفظ کیلئے وفاقی وزیر برائے پانی و بجلی خواجہ محمد آصف کی سربراہی میں جائزہ کمیٹی تشکیل دی تھی، وزیر مملکت و چیئرمین سرمایہ کاری بورڈ ڈاکٹر مفتاح اسماعیل کمیٹی میں شامل تھے جس نے شراکت داروں کے ساتھ متعدد اجلاس منعقد کئے اور ملک میں گرین فیلڈ انویسٹمنٹ کو راغب کرنے کے ساتھ ساتھ بند آٹو یونٹس کی بحالی کیلئے نیا پالیسی پیکیج پیش کیا، پالیسی کا انجینئرنگ سے متعلق حصہ انجینئرنگ بورڈ جبکہ مالیاتی حصہ ڈاکٹر مفتاح اسماعیل نے تیار کیا، پالیسی کی منظوری کے بعد ڈاکٹر مفتاح اسماعیل نے آٹو کے شعبہ میں سرمایہ کاروں کو راغب کرنے کیلئے متعدد اقدامات کئے۔انہوں نے اس سلسلے میں ملک کے اندر مختلف شراکت داروں سے ملاقاتیں کیں اور غیرملکی کمپنیوں کو سرمایہ کاری کیلئے مدعو کرنے کیلئے بیرون ملک دورے بھی کئے، ڈاکٹر مفتاح نے واکس ویگن، فیوجیٹ، رینالٹ، فی ایٹ اور نسان جیسی معروف کمپنیوں کے منتظمین کے ساتھ ملاقاتیں کیں۔عیدالاضحٰی کی تعطیلات کے دوران وفاقی وزیر خزانہ سینیٹر اسحاق ڈار اور چیئرمین سرمایہ کاری بورڈ ڈاکٹر مفتاح اسماعیل نے فرانس کا دورہ کیا اور رینالٹ کی اعلیٰ قیادت سے ملاقات کی، ان کوششوں کے نتیجے میں رینالٹ نے پاکستان میں سرمایہ کاری کرنے کا فیصلہ کیا ہے۔رینالٹ پاکستان میں 2018ء تک کاروں کی اسمبلنگ شروع کردے گی، یہ پیشرفت وزیر اعظم محمد نواز شریف کی اقتصادی پالیسی اور ویژن پر عملدرآمد کا نتیجہ ہے۔