اسلام آباد(این این آئی)سپریم کورٹ آف پاکستان نے کہاہے کہ ”’معزز“جیسے القابات کو عدالتوں کے لیے استعمال نہیں کیا جانا چاہیے۔سپریم کورٹ اور ہائی کورٹس کے لیے ’معزز‘ کا لقب استعمال کرنے سے متعلق تحریری حکم نامہ جاری کیا۔جسٹس قاضی فائز عیسیٰ نے اسٹیٹ لائف انشورنس کے

ملازم کے کیس میں حکم جاری کیا جس میں انہوں نے کہا کہ امید ہے ججز، وکلا اور درخواست گزار خوشامدی اور متعصب ہونے کے تاثر سے گریز کریں گے۔جسٹس قاضی فائز عیسیٰ نے اپنے حکم نامے میں لکھا کہ آئین پاکستان میں معزز یا عزت ماب جیسے القابات عدالتوں کیلئے نہیں لکھے گئے، پارلیمنٹ، قومی و صوبائی اسمبلی کیلئے ’معزز‘ کا لفظ کوئی استعمال نہیں کرتا تاہم سپریم کورٹ یا ہائی کورٹس کیلئے ”معزز عدلیہ‘‘کا لقب عام استعمال ہو رہا ہے۔انہوں نے کہاکہ برطانوی پارلیمنٹ جو پارلیمانی نظام کی ماں کہلاتی ہے وہاں بھی معزز پارلیمنٹ نہیں لکھا جاتا، ججز یا ارکان پارلیمنٹ کو معزز ممبران لکھنے میں حرج نہیں۔جسٹس قاضی فائز عیسیٰ نے کہاکہ کیس کی سماعت کے دوران وکیل نے بار بار معزز سپریم کورٹ کہا، استفسار پر وکیل نے بتایا کہ لاہور ہائی کورٹ کے فیصلے میں 16 مرتبہ معزز سپریم کورٹ لکھا گیا۔عدالت نے سروس ٹربیونل کے فیصلے کے خلاف شوکت علی کی درخواست خارج کر دی۔

موضوعات:جسٹس قاضی فائز عیسیٰ