کراچی(این این آئی)سندھ ہائیکورٹ نے صوبائی وزیراطلاعات شرجیل انعام میمن کی نظر ثانی کی درخواست منظور کرتے ہوئے ان کا نام مستقل ای سی ایل نے نکالنے کا حکم دیا ہے۔ سندھ ہائی کورٹ میں پیپلزپارٹی رہنما شرجیل میمن اور دیگر کے خلاف محکمہ اطلاعات سندھ میں

پونے چھ ارب روپے کرپشن کے معاملے پر شرجیل میمن کو عدالت سے بڑا ریلیف مل گیا۔سندھ ہائی کورٹ نے شرجیل میمن کی نظر ثانی کی درخواست منظورکرتے ہوئے صوبائی وزیر سندھ شرجیل میمن کا نام مستقل ای سی ایل سے نکالنے کا حکم دے دیا۔جسٹس کے کے آغا کی سربراہی میں 2 رکنی بینچ نے شرجیل میمن کی محکمہ اطلاعات سندھ کے کرپشن ریفرنس میں نظر ثانی کی درخواست پر فیصلہ سنادیا۔درخواست کی سماعت پر شرجیل میمن کے وکیل راج علی واحد ایڈووکیٹ نے دلائل دیتے ہوئے کہا کہ عدالت نے ضمانت منظور کرتے وقت نام ای سی ایل میں شامل کرنے کا حکم دیا تھا، شرجیل میمن کو ملک سے باہر جانے کے لیے بار بار اجازت لینا پڑتی ہے، وہ ٹرائل کورٹ میں باقاعدگی سے پیش ہو رہے ہیں، عدالت سے استدعا ہے کہ ان کا نام مستقل ای سی ایل سے خارج کرنے کا حکم دیا جائے۔ اس موقع پر نیب اور وفاقی حکومت کے وکیل نے بھی نام شرجیل میمن کا نام مستقل بنیادوں پر ای سی ایل سے خارج کرنے کی مخالفت نہ کی۔عدالت نے فریقین کا موقف سننے کے بعد شرجیل میمن کی نظر ثانی درخواست منظور کرتے ہوئے صوبائی وزیر کا نام مستقل بنیادوں پر ای سی ایل سے خارج کرنے کا حکم دے دیا۔ درخواست پر فیصلہ جسٹس کے کے آغا کی سربراہی میں 2 رکنی بینچ نے محفوظ کیا تھا۔