اسلام آباد (مانیٹرنگ ڈیسک )سینئر صحافی و تجزیہ کار حامد میر نے کہا کہ عمران خان چاہتے ہیں پاکستان کی فوج غیرجانبداری چھوڑ کر سیاست میں مداخلت کرے،سابق وزیراعظم کی خواہش ہے کہ فوج موجودہ حکومت کو نکال کر عمران خان کو دوبارہ اقتدار دیدے۔
نجی ٹی وی جیو کے پروگرام کے دوران حامد میر کا کہنا تھا کہ عمران خان چاہتے ہیں الیکشن فوری ہوں اور اس کے نتائج بھی ان کی مرضی کے ہوں، عمران خان نے نیوٹرل ہونے کو ایک طعنہ بنادیا ہے، عمران خان کہتے تھے ان کے گھر کی خواتین کا سیاست سے کوئی تعلق نہیں ہے ان کے بارے میں سیاسی بیانات نہیں دینے چاہئیں،بشریٰ بی بی کی مبینہ آڈیو آنے کے بعد عمران خان وضاحت کریں کہ تحریک انصاف کے ڈیجیٹل میڈیا کے انچارج ارسلان خالد پارٹی سے ہدایات لیتے ہیں یا ان کے گھر کی خواتین سے ہدایات لیتے ہیں۔حامد میرکا کہنا تھا کہ عمران خان حکومت کو ہٹانا چاہتے ہیں تو اسمبلی میں واپس آکر شہباز شریف کیخلاف تحریک عدم اعتماد لائیں۔دوسری جانب سینئر تجزیہ کار و اینکر پرسن شاہ زیب خانزادہ نے کہا ہے کہ سابق وزیراعظم و چیئرمین تحریک انصاف عمران خان اس وقت بہت کنفیوژ ہیں، وہ خود کو اینٹی اسٹیبلشمنٹ بھی ظاہر کرنا چاہ رہے ہیں لیکن پرانے عمران خان سے باہر نہیں نکل پارہے ہیں، عمران خان اپوزیشن پر مشرک ہونے کا الزام لگاتے ہیں کہ یہ اقتدار کیلئے اللہ کے علاوہ دوسروں پر بھروسہ کرتے ہیں لیکن پانچ منٹ بعد کہتے نظر آتے ہیں کہ اسٹیبلشمنٹ حکومت کو نکال کر مجھے اقتدار میں لائے، عمران خان نے آج باقاعدہ روز محشر کو بیان کرتے ہوئے بتایا کہ اللہ میاں کیا کیا سوال پوچھیں گے، اللہ میاں کے اسٹیبلشمنٹ کے ساتھ جملے کیا ہوں گے ججوں کے ساتھ کیا ہوں گے، ججوں سے اللہ تعالیٰ کیا سوال کرے گا اور جرنیل سے نیوٹرل سے اللہ تعالیٰ کیا سوال کرے گا۔
