کراچی (این این آئی)سندھ میں پانی کا بحران شدت اختیار کر گیاہے۔اس ضمن میں مشیر زراعت سندھ منظور وسان نے کہا ہے کہ صوبے میں پانی کی قلت 45 فیصد تک جاپہنچی ہے، حصے کا پورا پانی نہ ملنے سے سندھ کی زرعی معیشت کو خطرہ ہے۔مشیر زراعت سندھ منظور وسان نے اپنے ایک بیان میں بتایا کہ سندھ میں پانی کی کمی روز بروز بڑھتی جارہی ہے،پانی قلت سے گنے، آم، چاول، مرچ، زیتون اور کھجور کے باغات کو نقصان ہوسکتا ہے۔انہوں نے کہا کہ پی ٹی آئی حکومت میں اکتوبر 2018 سے مارچ 2022 تک سندھ کو 189اعشاریہ 29 ملین ایکڑ فٹ زرعی پانی کم ملا ہے۔مشیر زراعت نے کہا کہ عمران حکومت میں سندھ کو حصے کا پانی کم ملنے سے گزشتہ سال گندم، چاول اور کپاس کی فصلیں کم ہوئیں۔منظور وسان نے کہا کہ ساڑھے تین سالوں میں سندھ کا حصہ 161 اعشاریہ 1 ملین ایکڑ فٹ بنتا ہے، جبکہ گزشتہ ساڑھے 3 سالوں میں سندھ کو خریف میں پانی 16 فیصد اور ربیع میں 22 فیصد کم ملا ہے۔منظور وسان نے کہا کہ سندھ کو اپنے حصیکا پانی پورا دیا جائے، کٹوتی کسی صورت قبول نہیں ہے۔