اکرا(نیوزڈیسک ) گھانا میں کے دارالحکومت میں پیٹرول پمپ پر دھماکے اوراس کے بعد آگ لگنے کے نتیجے میں 90 افراد ہلاک ہوگئے۔غیرملکی خبررساں ادارے کے مطابق فائربریگیڈ حکام نے بتایا کہ پہلے قریبی ٹرک اڈے پر آگ لگی اور اس نے پیٹرول پمپ کو بھی اپنی لپیٹ میں لے لیا اوردیکھتے ہی دیکھتے آگ کے شعلوں نے پورے اسٹیشن کو راکھ کا ڈھیر بنادیا۔ حکام کا کہنا تھا کہ موسلادھار بارش کے باعث لوگوں نے پیٹرول پمپ پرپناہ لے رکھی تھی اور جب پیٹرول پمپ پر آگ لگنے سے دھماکا ہوا تو لوگوں کو سنبھلنے کا موقع نہ ملا جس کی وجہ سے اتنی بڑی تعداد میں ہلاکتیں ہوئیں۔عینی شاہدین نے غیرملکی خبررساں ایجنسی کو بتایا کہ یہ بہت مصروف علاقہ ہے اوریہاں اکثر ٹریفک اورلوگوں کا ہجوم رہتا ہے جب کہ ایک درجن کے قریب چھوٹی بسیں اورکاریں موسلا دھار بارش کی وجہ سے پیٹرول پمپ پر کھڑی تھیں جو جل کر راکھ کا ڈھیر بن گئیں اوراس میں بیٹھے مسافرجل کرہلاک ہوگئے۔ریسکیوٹیموں نے جائے وقوعہ پر پہنچ کر لاشوں کو قریبی اسپتال منتقل کردیا جہاں اسپتال انتظامیہ کا کہنا ہے کہ لاشیں اتنی بری طرح جھلس چکی ہیں کہ ان کی شناخت ایک مسئلہ بن گیا ہے۔