دبئی(نیوزڈیسک)رواں سال کے پہلے 3 ماہ کے دوران پاکستانیوں کی جانب سے دبئی میں تقریباً 40 کروڑ ڈالر مالیت کی پراپرٹی خریدی گئی جس میں اپارٹمنٹس اور لگڑری ولاز شامل ہیں۔ دبئی لینڈ ڈیپارٹمنٹ کی رپورٹ کے مطابق ریئل اسٹیٹ کے شعبے میں پاکستان دبئی میں سرمایہ کاری کے لحاظ سے دوسرا بڑا ملک بن چکا ہے جبکہ پہلا نمبر بھارت کا ہے۔ رپورٹ کے مطابق 2015ءکے پہلے تین ماہ میں صرف 935پاکستانی سرمایہ کاروں نے 397ملین ڈالرز مالیت کے اپارٹمنٹس، آفسز اور لگڑری ولاز کی خریداری کی جبکہ 2013ءاور 2014ءمیں پاکستانوں کی جانب سے مجموعی طور پر 4ارب ڈالرسے زائد کی پراپرٹی خریدی گئی تھی۔ رپورٹ میں مزید بتایا گیا ہے کہ بیشتر پاکستانیوں کی جانب سے خریداری کے لئے پوش جگہوں کا انتخاب کیا گیا ہے جہاں ایک اپارٹمنٹ کی اوسط قیمت 21کروڑ روپے سے زائد ہے۔