اسلام آباد (نیوز ڈیسک) سابق وزیراعظم میاں محمد نواز شریف، مریم نواز اور کپٹن صفدر کو ایون فیلڈ پراپرٹی ریفرنس میں سزا سنانے والے احتساب عدالت کے جج محمد بشیر ڈیرہ اسماعیل کے رہنے والے ہیں، وہ 1958ء کو پیدا ہوئے، ان کے آباؤ اجداد بھارت سے ہجرت کرکے جنوبی خیبرپختونخوا کے سرائیکی بولنے والے ضلع ڈیرہ اسماعیل خان میں رہائش پذیر ہوئے، محمد بشیر کی مادری زبان اردو ہے۔ احتساب عدالت کے جج نے ڈیرہ اسماعیل خان سے ہی ابتدائی تعلیم حاصل
کی، اس کے بعد گومل یونیورسٹی اور پشاور میں تعلیم حاصل کی۔ 1990ء میں پنجاب یونیورسٹی سے ایل ایل ایم کیا۔ محمد بشیر سول جج تعینات ہوئے تھے بعد ازاں ایڈیشنل سیشن جج اور ڈسٹرکٹ اینڈ سیشن جج کے عہدوں پر ترقی پائی۔ واضح رہے کہ اس سال کے آغاز میں وہ ریٹائرمنٹ کی عمر کو پہنچ چکے تھے لیکن انہیں تین سال کے لیے مدت ملازمت میں توسیع دی گئی، پیشہ ورانہ حلقوں میں محمد بشیر اپنی قانونی قابلیت اور دیانتدارانہ رویہ رکھنے کی شہرت رکھتے ہیں۔
