اسلام آباد (آئی این پی) سربراہ عوامی مسلم لیگ شیخ رشید احمد نے کہا ہے کہ چیف جسٹس نے ایک ہفتے میں زچہ بچہ ہسپتال کی رپورٹ طلب کی ہے‘ چیف جسٹس نے کہا کہ عید کے بعد ہسپتال کا دورہ کروں گا‘ الیکشن کمیشن میں حلقہ بندیوں کا کیس لگا ہوا ہے۔ بدھ کو سپریم کورٹ کے باہر میڈیا سے گفتگو کرتے ہوئے شیخ رشید نے کہا کہ چیف جسٹس نے ایک ہفتے میں زچہ بچہ ہسپتال
کی رپورٹ طلب کی ہے۔ چیف جسٹس نے نوٹس لیا ہے کہ ہسپتال پر کام کیوں نہیں ہورہا۔ چیف جسٹس نے کہا عید کے بعد ہسپتال کا دورہ کروں گا۔ الیکشن کمیشن میں حلقہ بندیوں کا کیس لگا ہوا ہے۔ پولنگ اسٹیشنز پر کوئی انتظامات نہیں ہیں۔ صحافی نے سوال کیا کہ آپ نے انگوٹھی پہننی شروع کردی شیخ رشید نے جواب دیا کہ میں نے کل پندرہ سو روپے کی دو انگوٹھیاں خریدی ہیں۔
