چکوال(مانیٹرنگ ڈیسک) پنجاب کے نواحی گاؤں چتال میں تھانہ صدر کی حدود میں 2 شادی شدہ خواتین کو غیرت کے نام پر گولی مار کے قتل کردیا گیا۔ ایک نجی ٹی وی چینل کی رپورٹ کے مطابق قتل ہونے والی خواتین میں سے ایک 6 سے 7 ماہ کی حاملہ تھی۔ پولیس ذرائع کے مطابق اسما رمضان اور ان کی نند فاخرہ بی بی اپنے گھر میں تھیں کہ اسی دوران اسما کے بھائی نے زبردستی گھر میں گھس کر ان دونوں پر فائرنگ کر دی۔ فائرنگ کے نتیجے میں دونوں خواتین موقع پر ہی جاں بحق ہوگئیں

جبکہ ملزم جائے وقوعہ سے فرار ہونے میں کامیاب ہوگیا۔ پولیس ذرائع نے اس حوالے سے بتایا کہ اسما کا خاوند سعودی عرب میں ملازمت کرتا ہے اور فاخرہ بی بی کا شوہر جہلم میں موجود ہے لیکن فاخرہ بی بی اسماء کے ساتھ ایک ماہ سے مقیم تھی۔ پولیس ذرائع کے مطابق ملزم کو شبہ تھا کہ دونوں خواتین کے غیر اخلاقی تعلقات ہیں، اس حوالے سے دفعہ 311 اور 302 کے تحت دوہرے قتل کا مقدمہ درج کر لیا گیا۔ یاد رہے کہ غیرت کے نام پر چکوال میں یہ قتل کا چوتھا واقعہ ہے۔