اسلام آباد (نیو ز ڈیسک )ایوی ایشن سائنس کی حیرت انگیز ترقی نے فضائی سفر کو انتہائی محفوظ بنادیا ہے مگر آج بھی خراب موسمی حالات یا تکنیکی خرابیوں کی وجہ سے بعض اوقات طیارے اس قدر خطرناک انداز میں لینڈنگ یا ٹیک آف کرتے نظر آتے ہیں کہ انہیں دیکھ کر دل خوف سے کانپ اٹھتا ہے جبکہ ان کے بہادر پائلٹوں کی مہارت کو داد دئیے بغیر بھی نہیں رہا جاسکتا۔
ذیل میں دی گئی تصاویر بھی کچھ ایسے ہی خطرناک مناظر کی عکاسی کرتی ہیں جنہیں فضائی تاریخ کے خوفناک مناظر کہا جائے تو بے جا نہ ہوگا۔
حال ہی میں ترک ایئرلائن کا اٹلی کے شہر ملان سے استنبول آنے والا طیارہ اتاترک ایئرپورٹ پر لینڈنگ کررہا تھا کہ اس کے انجن میں آگ لگ گئی اور یہ رن وے سے اتر گیا۔ طیارہ خوفناک حادثے سے بال بال بچا اور ریسکیو اہلکاروں نے بروقت کارروائی کرتے ہوئے مسافروں کو بحفاظت نکال لیا۔ جرمن ایئرلائن یورو ونگز کا طیارہ ٹیک آف کے بعد مطلوبہ بلندی حاصل نہ کرپایا جس کی وجہ سے اس کے پہیے نیچے کھڑے طیاروں اور درختوں کو تقریباً چھوتے ہوئے گزرے، البتہ جلد ہی انجن کا بھرپور استعمال کرتے ہوئے یہ اچانک اوپر اٹھ گیا۔
ایرو لائنیئس ارجنٹناس کی ایئربس A340-300 رن وے پر حرکت کررہی تھی کہ اسی دوران یوٹیر ایئرلائن کا بوئنگ 767-300 طیارہ لینڈنگ کے لئے آگیا۔ اگر یہ طیارہ عین آخری لمحے بلندی میں اضافہ نہ کرتا تو خوفناک حادثہ ہوجاتا۔ یہ طیارہ تیزی سے اوپر اٹھا اور فضا میں چکر لگانے کے بعد دوبارہ لینڈنگ کے لئے آیا۔ سینٹ بارتھلمی میں ایک چھوٹا طیارہ لینڈنگ کے دوران بروقت رکنے میں ناکام رہا اور رن وے کے آخری سرے سے آگے نکلتا ہوا سمندر میں جا گھسا۔
