اسلام آباد (نیوز ڈیسک ) انٹرنیٹ پر لڑکی کا روپ دھار کر لوگوں کو بے وقوف بنانے والے لڑکوں کی تو کوئی کمی نہیں لیکن ایک امریکی لڑکی نے لڑکا بن کر بیک وقت سات دوشیزاﺅں کو چکرا دیا۔
ریاست ٹیکساس سے تعلق رکھنے والی ساتوں خواتین، جن میں سے چند برائگم ینگ یونیورسٹی کی طالبات ہیں، کئی ماہ سے سمجھ رہی تھیں کہ وہ اپنے خوابوں کے شہزادے کے ساتھ آن لائن تعلق بنا چکی ہیں اور اس سے حقیقی زندگی میں ملاقات کے لئے کوشاں تھیں۔ جب ان میں سے ایک دوشیزہ کو کچھ شکوک و شبہات پیدا ہوئے تو اس نے تحقیقات کا آغاز کیا جس کے نتیجے میں 24 سالہ سیاہ فام لڑکی کائلہ کا سراغ ملا جو بیک وقت سات لڑکیوں کی محبوب بنی ہوئی تھی۔ مشہور ٹی وی شو Dr Phil میں ان تمام خواتین کو مدعو کیا گیا تو کائلہ نے اپنی عجیب و غریب کہانی بیان کی۔ اس کا کہنا تھا کہ وہ یہ جاننا چاہتی تھی کہ وہ ہم جنس پرست ہے یا نہیں اور اس مقصد کے لئے اس نے ایک طالبعلم کیگن کی شناخت چرائی اور پھر جعلی اکاﺅنٹ کے ذریعے لڑکیوں سے روابط شروع کردئیے۔ کائلہ کا کہنا تھا کہ سات لڑکیوں کے ساتھ تعلق بنانے کے بعد وہ اس نتیجے پر پہنچی کہ وہ ہم جنس پرست ہے۔ دوسری جانب اس کا شکار بننے والی خواتین کا کہنا ہے کہ وہ واقعی یہ سمجھتی رہیں کہ ان کی بات چیت ایک ہینڈسم اور قابل نوجوان سے ہورہی تھی اور وہ حقیقت جان کر بہت مایوس ہوئیں۔ جریدے ”میل آن لائن“ کے مطابق کائلہ کی جعلسازی کی اطلاع پولیس کو بھی دی گئی لیکن بوجوہ کوئی قانونی کارروائی نہ کی۔
