نیویارک (نیوز ڈیسک) ہونٹ بھینچ کر مکا دکھاتے ہوئے اس پیارے بچے کی تصویر آپ نے بے شمار دفعہ دیکھی ہوگی اور شاید کئی دفعہ فیس بک پر پوسٹ بھی کی ہوگی۔ یہ تصویر 2007ئ میں اس بچے سیم گرائنر کی والدہ لینے گرائنر نے امریکی ریاست فلوریڈا کے ساحل سمندر پر بنائی۔ دلچسپ بات یہ ہے کہ یہ بچہ اب 8 سال کا ہوچکا ہے لیکن افسردہ کردینے والی بات یہ ہے کہ اس کے باپ جسٹن گرائنر کے گردے ناکارہ ہوچکے ہیں اور ننھا سیم اس وقت اپنے والد کے کڈنی ٹرانسپلانٹ کے آپریشن اور بعد ازاں جاری رہنے والے مہنگے علاج کے لئے فنڈز اکٹھے کررہا ہے۔ لینے گرائنر نے ٹی وی چینل ”ABC نیوز“ سے بات کرتے ہوئے بتایا کہ وہ نہیں چاہتی تھیں کہ اپنے بیٹے کی شہرت کو فنڈ ریزنگ کے لئے استعمال کریں لیکن ان کے خاوند پچھلے چھ سال سے ڈائلسز کے سہارے زندہ ہیں اور اب ان کی حالت تشویشناک ہوچکی ہے جس کی وجہ سے وہ سیم کی تصویر کو فنڈریزنگ کے لئے استعمال کرنے پر مجبور ہوگئیں۔ لینے گرائنر نے ویب سائٹ gofundme.com پر اپنے خاوند جسٹن کے گردے کے ٹرانسپلانٹ کے لئے فنڈ ریزنگ کا آغاز کیا جسے سیم کے مداحوں کا بے پناہ تعاون مل رہا ہے۔ انہوں نے اپنے بیٹے کی بچپن کی تصویر کی وضاحت کرتے ہوئے بتایا کہ 11 ماہ کا سیم مٹھی میں ریت بھر کر اپنے منہ میں ڈالنے ہی والا تھا کہ انہوں نے تصویر بنالی جو بعد ازاں اس قدر مقبول ہوئی کہ انٹرنیٹ کے علاوہ میڈیا اور خصوصاً ٹی وی کمرشلز کا بھی حصہ بن گئی۔