لاہور(آن لائن ) بھارت سے 200سے زائد ہندویاتریوں کا وفد واہگہ کے راستے لاہورپہنچ گیا۔ واہگہ پر متروکہ وقف املاک بورڈ کے چیئرمین صدیق الفاروق سیکرٹری ہندوئوں کے متبرک مقامات اور ہندو کونسل کے رہنما نے ہندوئوں یاتریوں کا خیر مقدم کیا۔ واہگہ بارڈر پر وفد کے قائدین کو پھولوں کے ہار پہنائے گئے اور ان کی چائے اور مٹھائی سے تواضع کی گئی۔ سائوتھ انڈیا سمیت بھارت کے مختلف شہروں سے پاکستان آنے والے ہندوئوں یاتریوں کا وفد کٹاس راس میں شیوراتری کے تہوار میں
شرکت کے گا اور پاکستان میں چھ روز قیام کرے گا۔ واہگہ بارڈر پر میڈیا سے گفتگو کرتے ہوئے ہندویاتریوں نے کہا کہ انہیں پاکستان پہنچ کر بہت خوشی ہوئی ہے اور وہ پاکستانی سرکار کے شکر گزار ہیں کہ پاکستان میں ہندوئوں کے مذہبی مقامات کا خیال رکھا جارہا ہے۔مختلف سوالوں کا جواب دیتے ہوئے ہندویاتریوں نے کہا کہ دونوں ملکوں کے عوام امن اور شانتی چاہتے ہیں اور بالآخر دونوں ملکوں میں امن وشانتی آجائے گی۔ انہوں نے کہا کہ مختلف معاملات پر تنقید کرنا حکومتوں کا کام ہے مگر ہم جس مقصد کے لئے پاکستان آئے ہیں اسے پورا کریں گے انہوںنے حکومت پاکستان کا شکریہ ادا کرتے ہوئے کہا کہ پاکستانی سرکار نے 237ہندوئوں کو یاترا ویزے جاری کیے۔
