کیلیفورنیا(نیوز ڈیسک) امریکی نوجوان گلوکار جسٹن بیبر گلوکاری کے شعبے میں اگرچہ بہت مقبول اور کامیاب ہیں لیکن جب بات ہو کھیل کی تو پھر پروفیشنل پلیئرز ہی اچھی کر کردگی دکھا پاتے ہیں، جسٹن بیبر نے بھی چیریٹی مقابلے میں کینیڈا کی ٹینس سٹار یوجینی بوشارڈ کو چیلنج کیا لیکن انہیں زیر کرنے میں ناکام رہے اور یوجینی با آسانی مقابلہ جیت گئیں۔ امریکی اداکار ول فیرل نے کیلیفورنیا میں چیریٹی مقاصد کے لئے نمائشی ٹینس میچوں کا اہتمام کیا جس میں یوجینی بوشارڈ، ڈینیلا ہنکچووا اور فرنینڈو ورڈاسکو جیسے ٹینس سٹارز شریک ہوئے، ساتھ ہی کامیڈین کیون ہارٹ بھی اس کا حصہ بنے۔ نمائشی میچوں میں جسٹن بیبر نے یوجینی کے ساتھ پیئر بنا کر ایک میچ جیتا تاہم جب بات آپس میں مقابلے تک پہنچی تو یوجینی ہی فاتح رہیں۔ اس موقع پر ٹینس اور شوبز ستاروں کے ساتھ ان کے پرستاروں نے تصویریں بنوائیں اور آٹو گراف لئے۔