کوٹ کپورہ /فریکوٹ(آئی این پی)بھارتی وزیراعظم نریندر مودی نے الزام عائد کیا ہے کہ پاکستان نے ہمیشہ ریاست پنجاب کو غیر مستحکم کرنے کی کوشش کی ہے ،پاکستان سے بھارت کو خطر ہ ہے کیونکہ وہ ہمیشہ ہمیں دھمکیاں دیتا رہا ہے اس لیے ریاستی عوام اکالی دل اور بی جے پی اتحاد کو ووٹ ڈالیں تاکہ سرحدی ریاست میں ایک مضبوط حکومت قائم کی جاسکے،اگر ریاست میں ایک کمزور یا باہر والوں کی حکومت آگئی تو یہ پنجاب اور ملک کیلئے بہت برا ہوگا۔

اتوارکو بھارتی میڈیا کے مطابق چندھی گڑھ سے 225کلومیٹر دور واقع پنجاب کے زرعی علاقے کوٹ کپورہ میں انتخابی ریلی سے خطاب کرتے ہوئے کہاکہ پاکستان سے بھارت کو خطر ہ ہے کیونکہ وہ ہمیشہ ہمیں دھمکیاں دیتا رہا ہے اس لیے ووٹرز پنجاب میں اکالی دل اور بی جے پی اتحاد کو ووٹ ڈالیں تاکہ سرحدی ریاست میں ایک مضبوط حکومت قائم کی جاسکے ۔مودی نے عوام کو خبردارکیا کہ ان جماعتوں کو ووٹ نہ دیں جو اپنے مفادات کیلئے حکومت بنانا چاہتی ہیں۔بھارتی وزیراعظم نے کہا کہ پنجاب ایک سرحدی ریاست ہے ۔ پاکستان ہمیشہ سے پنجاب کو غیر مستحکم کرنے کیلئے موقعوں کی تلاش میں رہا ہے ۔اگر ریاست میں ایک کمزور حکومت یا باہر والوں کی یا پرتعیش لوگوں کی حکومت آگئی تو یہ پنجاب اور ملک کیلئے بہت برا ہوگا۔انھوں نے کہاکہ ہمیں اس بات کو یقینی بنانا ہے کہ ہم ایک مضبوط حکومت ہیں اور آپ نے مناسب طریقے سے ووٹ ڈالنے کو یقینی بنانا ہے ۔واضح رہے کہ 4فروری کو ریاست پنجاب میں 117اسمبلی سیٹوں کیلئے انتخابات ہورہے ہیں جہاں اکالی دل بی جے پی ایک ساتھ میدان میں ہیں اسکے علاوہ کانگریس اور عام آدمی پارٹی بھی میدان میں ہے ۔