اسلام آباد(آئی این پی)وفاقی وزیرداخلہ چوہدری نثار علی خان نے تحریک انصاف کے یوتھ کنونشن میں خاتون سیاسی کارکن کی طرف سے پتھراؤ کے دوران ساتھی اہلکار کو بچانے والی اسلام آباد پولیس کی خاتون اہلکار اے ایس آئی فرزانہ بیگم کی بہادری کی تعریف کرتے ہوئے 50ہزار روپے انعام اور تعریفی سند دینے کا اعلان کردیا۔تفصیلات کے مطابق اے ایس آئی فرزانہ بیگم نے گذشتہ روز پی ٹی آئی کی جانب سے دفعہ 144کے نفاذ کے باوجود بغیر اجازت منعقد کیے گئے یوتھ کنونشن کے دوران دلیری کا مظاہرہ کرتے ہوئے ساتھی پولیس اہلکار کو ایک خاتون سیاسی کارکن کی جانب سے پتھر کا نشانہ بننے سے بچایا۔ اس دوران وہ خود بھی زخمی ہوئیں۔ہفتہ کو وزیرداخلہ چوہدری نثار علی خان نے قانون کی عمل داری کو یقینی بنانے اور دوران ڈیوٹی پیشہ ورانہ ذمہ داری کا مظاہرہ پر انہیں پچاس ہزار روپے انعام اور تعریفی سنددینے کا اعلان کیا۔چوہدری نثار علی خان نے خاتون پولیس اہلکار کی فرض شناسی اور ذمہ دارانہ رویے کو سراہتے ہوئے کہا کہ خاتون پولیس اہلکار کا پیشہ ورانہ رویہ اور فرض شناسی دیگر پولیس اہلکاروں کے لئے قابلِ تقلید ہے