لاہور (نیوزایجنسیاں)گول روٹی نہ بنانیوالی بیٹی کے قاتل باپ کا عبرتناک انجام، عدالت نے مجرم کو سزائے موت سنادی۔ایڈیشنل ڈسٹرکٹ اینڈ سیشن جج محمد اصغر نے معصوم بچی کے قتل کیس کا فیصلہ سنایا، عدالت نے جرم ثابت ہونے پر قاتل باپ خالد محمود کو سزائے موت کے ساتھ ساتھ 5 لاکھ روپے جرمانے کی سزا بھی سنائی۔گزشتہ سال ستمبر میں تھانہ شادباغ میں مجرم کیخلاف اپنی 12 سالہ بیٹی انیقہ کے قتل کا مقدمہ درج کیا تھا، خالد محمود نے اپنی بیٹی کو گول روٹی نہ پکانے پر قتل کردیا تھا۔عظیم پارک شادباغ کے رہائشی خالد محمود نے 13 ستمبر 2015ء کو مقدمہ درج کرایا کہ اس کی بیٹی انیقہ گھر سے سودا سلف لینے نکلی مگر واپس نہیں آئی، اسے شبہ ہے کہ نامعلوم افراد نے اغوا کرلیا ہے، پولیس نے مقدمہ درج کرلیا، اگلے روز ایوننگ روڈ پر مردہ خانے کے باہر سے انیقہ کی تشدد زدہ نعش ملی جسے پولیس نے مردہ خانے میں جمع کرادیا اور وارثان کی تلاش شروع کردی۔انیقہ کے والد نے دیگر رشتہ داروں کے ہمراہ نعش مردہ خانے میں شناخت کر لی تاہم اس کے قتل کا معمہ حل نہ ہوسکا، بچی کی ماں نے بالآخر بھانڈا پھوڑ دیا اور پولیس کو معاملے سے آگاہ کردیا، پولیس نے مردہ خانے کے باہر لگے سی سی ٹی وی کیمرے کی فوٹیج سے تصدیق کے بعد خالد محمود کو حراست میں لے لیا تھا۔

موضوعات:گول روٹی