اسلام آباد(نیوز ڈیسک) پاکستان سے سعودی عرب سفر کرنے والے مسافروں کے لیے ایک اور سہولت فراہم کردی گئی ہے،
سعودی عرب کی نئی ایئرلائن ’ریاض ایئر‘ نے لاہور سے اپنے باقاعدہ فضائی آپریشن کا آغاز کردیا۔پاکستان ایئرپورٹس اتھارٹی کے مطابق ریاض ایئر کی پہلی پرواز RX676 لاہور کے علامہ اقبال انٹرنیشنل ایئرپورٹ پر پہنچی۔ نئی ایئرلائن کی آمد پر ایئرپورٹ کی فائر اینڈ ریسکیو ٹیم نے طیارے کو روایتی واٹر سیلوٹ پیش کرکے خوش آمدید کہا۔اس موقع پر ایئرپورٹ کے انٹرنیشنل ڈیپارچر لاؤنج میں خصوصی تقریب بھی منعقد کی گئی، جس میں پاکستان میں سعودی سفیر نواف بن سعید المالکی، ایئرپورٹ کے سینئر حکام اور پاکستان ایئرپورٹس اتھارٹی کے نمائندے شریک ہوئے۔افتتاحی تقریب کے دوران ریاض ایئر کے لاہور آپریشن کے باقاعدہ آغاز کی خوشی میں ربن کاٹا گیا اور کیک بھی کاٹا گیا۔پی اے اے کے ترجمان کے مطابق ریاض ایئر کی جانب سے لاہور سے پروازوں کا آغاز دونوں ممالک کے درمیان فضائی رابطوں کو مزید وسعت دینے کی جانب اہم پیش رفت ہے۔
اس نئے فضائی روٹ سے پاکستان اور سعودی عرب کے درمیان سفر کرنے والے مسافروں اور زائرین کو بہتر سفری سہولیات میسر آنے کی توقع ہے۔لاہور اور ریاض کے درمیان براہ راست فضائی رابطے کے قیام سے دونوں ملکوں کے درمیان سفری اور عوامی روابط کو مزید فروغ ملنے کی بھی امید ظاہر کی جارہی ہے۔
