اسلام آباد (نیوز ڈیسک) خیبر پختونخوا میں موسم گرما کی تعطیلات میں 31 اگست تک توسیع کی اطلاع سوشل میڈیا پر وائرل ہونے کے بعد محکمہ تعلیم نے اس معاملے پر وضاحت جاری کردی ہے۔

سوشل میڈیا پر محکمہ تعلیم خیبر پختونخوا سے منسوب ایک نوٹیفکیشن گردش کر رہا تھا، جس میں دعویٰ کیا گیا کہ شدید بارشوں اور ہیٹ ویو کے پیش نظر صوبے بھر کے تعلیمی اداروں میں موسم گرما کی تعطیلات مزید بڑھا دی گئی ہیں۔

وائرل دستاویز میں کہا گیا تھا کہ اسکول یکم ستمبر 2026 سے دوبارہ کھولے جائیں گے۔ سرکاری نوٹیفکیشن سے مشابہ انداز میں تیار کی گئی اس دستاویز کے باعث طلبہ، والدین اور تعلیمی اداروں میں بھی صورتحال کے حوالے سے تشویش پیدا ہوگئی۔

محکمہ تعلیم نے نوٹیفکیشن جعلی قرار دے دیا

خیبر پختونخوا کے ایلیمنٹری اینڈ سیکنڈری ایجوکیشن ڈیپارٹمنٹ نے سوشل میڈیا پر گردش کرنے والے نوٹیفکیشن کو جعلی اور غیر مصدقہ قرار دے دیا ہے۔

محکمہ تعلیم نے شہریوں کو ہدایت کی ہے کہ وہ اس قسم کی معلومات پر یقین کرنے یا انہیں آگے پھیلانے سے گریز کریں۔ تعلیمی اداروں کی تعطیلات یا دوبارہ کھولنے سے متعلق کسی بھی اعلان کی تصدیق صرف سرکاری ذرائع سے کرنے پر زور دیا گیا ہے۔

خیبر پختونخوا میں اسکول کب کھلیں گے؟

محکمہ تعلیم کے مطابق صوبے کے مڈل، ہائی اور ہائر سیکنڈری اسکولوں کے لیے موسم گرما کی تعطیلات 16 اگست 2026 کو ختم ہوں گی، جس کے بعد تعلیمی سرگرمیاں 17 اگست 2026 سے معمول کے مطابق شروع ہونے کا شیڈول ہے۔

محکمہ تعلیم کا کہنا ہے کہ فی الحال 31 اگست تک چھٹیوں میں توسیع کی کوئی منظوری نہیں دی گئی، لہٰذا والدین اور طلبہ وائرل نوٹیفکیشن کے بجائے محکمہ تعلیم کے باضابطہ اعلانات کو ہی معتبر سمجھیں۔

حکام کے مطابق اگر تعطیلات میں توسیع سے متعلق کوئی نیا فیصلہ کیا گیا تو اس کا اعلان باقاعدہ سرکاری نوٹیفکیشن کے ذریعے کیا جائے گا۔