اسلام آباد (نیوز ڈیسک) بیرون ملک مقیم پاکستانیوں کو ای پاسپورٹ کی سہولت مزید آسان بنانے کے حوالے سے اہم پیش رفت سامنے آئی ہے۔
تفصیلات کے مطابق ڈائریکٹر جنرل امیگریشن اینڈ پاسپورٹس محمد علی رندھاوا کی زیر صدارت اعلیٰ حکام کا اجلاس منعقد ہوا، جس میں ادارے کی مجموعی کارکردگی، جاری منصوبوں اور آئندہ کے لائحہ عمل کا جائزہ لیا گیا۔اجلاس کے دوران بیرون ملک پاکستانیوں کے لیے ای پاسپورٹ سروسز کے دائرہ کار کو وسیع کرنے کی تجاویز پر بھی غور کیا گیا۔ حکام نے اس بات کا جائزہ لیا کہ اوورسیز پاکستانیوں کو پاسپورٹ سے متعلق خدمات تک زیادہ سہل اور تیز رسائی کیسے فراہم کی جاسکتی ہے۔اجلاس میں ای پاسپورٹ میں موجود جدید سکیورٹی فیچرز اور عالمی معیار کے حفاظتی نظام کے حوالے سے حکام کو تفصیلی بریفنگ دی گئی۔ ڈی جی امیگریشن اینڈ پاسپورٹس نے ادارے میں ڈیجیٹل نظام کو مزید فعال بنانے اور خدمات کے معیار میں بہتری لانے کی ضرورت پر زور دیا۔
محمد علی رندھاوا نے متعلقہ افسران کو قانونی اور پالیسی اصلاحات کے عمل کو ترجیحی بنیادوں پر مکمل کرنے کی ہدایت کی اور مختلف اقدامات کے لیے ذمہ داریاں بھی تفویض کیں۔انہوں نے کہا کہ ای پاسپورٹ سے متعلق منصوبوں کو مقررہ مدت میں مکمل کیا جائے تاکہ شہریوں، خصوصاً بیرون ملک رہنے والے پاکستانیوں کو پاسپورٹ کی سہولیات زیادہ مؤثر اور آسان انداز میں دستیاب ہوسکیں۔حکام کے مطابق ای پاسپورٹ سسٹم میں جدید ڈیجیٹل سہولیات اور سکیورٹی ٹیکنالوجی کے اضافے سے پاسپورٹ سروسز کا معیار مزید بلند ہوگا اور اوورسیز پاکستانیوں کے لیے ان خدمات تک رسائی بھی زیادہ سہل بنائی جاسکے گی۔
