اسلام آباد (نیوز ڈیسک) وفاقی حکومت نے ملک کی گندم کی ضروریات پوری کرنے کے لیے 10 لاکھ ٹن گندم درآمد کرنے کی منظوری دے دی ہے۔
وفاقی وزیر نیشنل فوڈ سکیورٹی رانا تنویر حسین کے مطابق گندم درآمد کرنے کے طریقہ کار سے متعلق حتمی فیصلہ آئندہ ہفتے اقتصادی رابطہ کمیٹی کے اجلاس میں کیا جائے گا۔ اجلاس میں یہ طے کیا جائے گا کہ گندم سرکاری سطح پر درآمد کی جائے گی یا نجی شعبے کو درآمد کی اجازت دی جائے گی۔
رانا تنویر حسین کا کہنا تھا کہ وزیراعظم شہباز شریف کی زیر صدارت آئندہ ہفتے ہونے والے اجلاس میں گندم کی درآمد سے متعلق اہم فیصلے متوقع ہیں۔
وفاقی وزیر کے مطابق صوبوں نے بھی اپنی گندم کی ضروریات سے متعلق آگاہ کردیا ہے۔ پنجاب کی جانب سے 8 لاکھ ٹن، سندھ نے 7 لاکھ ٹن جبکہ خیبر پختونخوا نے 5 لاکھ ٹن گندم کی ضرورت ظاہر کی ہے۔
حکومت کی جانب سے گندم کی درآمد کا فیصلہ ملکی ضروریات اور دستیاب ذخائر کو مدنظر رکھتے ہوئے کیا گیا ہے۔
