اسلام آباد(نوز ڈیسک) ایمریٹس گروپ نے ایوی ایشن اور کارپوریٹ شعبوں میں ملازمت کے خواہشمند افراد کے لیے 100 سے زائد نئی اسامیوں کا اعلان کردیا ہے۔

عرب میڈیا کے مطابق گروپ کی جانب سے مختلف شعبوں میں بھرتیوں کا سلسلہ شروع کیا گیا ہے۔دستیاب آسامیوں میں انفارمیشن ٹیکنالوجی، انجینئرنگ، طیاروں کی دیکھ بھال، ایئرپورٹ آپریشنز، لاجسٹکس، ہیومن ریسورسز اور کسٹمر سروس سمیت متعدد شعبے شامل ہیں۔ امیدوار اپنی درخواستیں ایمریٹس گروپ کے آن لائن کیریئر پورٹل کے ذریعے جمع کرا سکتے ہیں۔مختلف عہدوں کے لیے ملازمین کو متعدد سہولیات اور مراعات بھی فراہم کی جاتی ہیں، جن میں ٹیکس فری تنخواہ، فرنشڈ رہائش یا ہاؤسنگ الاؤنس، ہیلتھ انشورنس، ملازم اور اہل خانہ کے لیے سالانہ فضائی ٹکٹ اور سفری رعایتیں شامل ہیں۔گروپ کی پرکشش آسامیوں میں پائلٹ کا عہدہ بھی شامل ہے، جس کے لیے سالانہ پیکیج تقریباً 12 لاکھ درہم تک بتایا گیا ہے۔ اس میں نقد تنخواہ کے علاوہ رہائش، تین بچوں تک تعلیمی الاؤنس، 42 دن کی سالانہ چھٹی، اہل خانہ کے لیے سالانہ بزنس کلاس سفر، ریٹائرمنٹ سیونگ میں کمپنی کی شراکت اور جامع انشورنس جیسی سہولیات شامل ہیں۔

ایمریٹس گروپ اپنے نیشنل کیڈیٹ پائلٹ پروگرام کے لیے بھی امیدواروں کی بھرتی جاری رکھے ہوئے ہے۔ پروگرام کے ابتدائی مرحلے میں زیرِ تربیت افراد کو ماہانہ 6,365 درہم دیے جاتے ہیں، جبکہ ایئرکرافٹ ٹائپ ریٹنگ ٹریننگ کے دوران یہ رقم 18,335 درہم اور لائن ٹریننگ کے مرحلے میں 31,745 درہم ماہانہ تک پہنچ جاتی ہے۔تربیتی پروگرام کامیابی سے مکمل کرنے کے بعد فرسٹ آفیسرز کو مختلف الاؤنسز سمیت تقریباً 52 ہزار درہم ماہانہ کا پیکیج دیا جاتا ہے۔دوسری جانب ایمریٹس کے کیبن کریو کے لیے بھی پرکشش پیکیج موجود ہے۔ کیبن کریو ارکان کو ٹیکس فری آمدنی کے تحت 4,980 درہم ماہانہ بنیادی تنخواہ کے علاوہ ہر فلائٹ آور کے حساب سے 69.60 درہم فلائنگ پے دیا جاتا ہے۔اوسط ماہانہ پرواز کے اوقات کو مدنظر رکھتے ہوئے کیبن کریو کی مجموعی ماہانہ آمدنی تقریباً 11 ہزار درہم تک پہنچ سکتی ہے۔ اس کے علاوہ کمپنی کی جانب سے کھانے کے الاؤنس، قیام کے دوران ہوٹل کی سہولت اور ایئرپورٹ تک آمدورفت کے لیے ٹرانسپورٹ بھی فراہم کی جاتی ہے۔