اسلام آباد(نوز ڈیسک) رواں ہفتے ملک بھر کے تمام بینک تین روز کے لیے بند رہیں گے، 17 اگست سے دوبارہ معمول کے مطابق اپنی سرگرمیاں بحال کریں گے۔
تفصیلات کے مطابق پاکستان بھر کے بینکوں اور مالیاتی اداروں میں اس ہفتے 3 روزہ تعطیلات ہوں گی، جس کے باعث بینک 14، 15 اور 16 اگست کو بند رہیں گے۔
اسٹیٹ بینک آف پاکستان کے جاری کردہ سرکلر میں کہا گیا ہے کہ جمعہ 14 اگست کو یوم آزادی کے موقع پر عام تعطیل ہوگی، جبکہ ہفتہ اور اتوار معمول کے مطابق ہفتہ وار تعطیلات ہوں گی۔
تین روزہ تعطیلات کے دوران اسٹیٹ بینک آف پاکستان اور اسٹاک ایکسچینج بھی بند رہیں گے۔
تاہم بینکوں کی فزیکل برانچز بند ہونے کے باوجود صارفین کو ضروری بینکاری سہولیات دستیاب رہیں گی جبکہ اے ٹی ایمز اور آن لائن بینکنگ سروسز معمول کے مطابق فعال رہیں گی۔
صارفین تین روزہ تعطیلات کے دوران اے ٹی ایمز اور ڈیجیٹل بینکنگ کے ذریعے معمول کی لین دین کرسکیں گے۔
بینک اور مالیاتی ادارے تین روزہ تعطیلات کے بعد 17 اگست سے دوبارہ معمول کے مطابق اپنی سرگرمیاں بحال کریں گے۔
خیال رہے ملک بھر میں یومِ آزادی روایتی جوش و جذبے اور اس عزم کے ساتھ منایا جائے گا، دن کا آغاز وفاقی دارالحکومت میں 31 اور صوبائی دارالحکومتوں میں 21، 21 توپوں کی سلامی سے ہوگا۔
