اسلام آباد (نیوز ڈیسک)متحدہ عرب امارات جانے کے خواہشمند پاکستانی شہریوں کے لیے ایک اہم پیش رفت سامنے آئی ہے۔
طویل عرصے تک جاری غیر یقینی صورتحال کے بعد یو اے ای نے پاکستانی پاسپورٹ ہولڈرز کے لیے وزٹ ویزوں کا اجرا دوبارہ شروع کر دیا ہے، جس سے سیاحت، کاروباری سرگرمیوں اور اہل خانہ سے ملاقات کے لیے سفر کرنے والوں کو بڑی سہولت ملنے کی توقع ہے۔
ذرائع کے مطابق رجسٹرڈ ٹریول ایجنٹس کے ذریعے جمع کرائی جانے والی درخواستوں پر دوبارہ کارروائی کی جا رہی ہے اور جن درخواست گزاروں کی دستاویزات مکمل اور درست ہیں، انہیں پہلے کے مقابلے میں زیادہ تیزی سے ویزے جاری کیے جا رہے ہیں۔
عرب نیوز کی رپورٹ کے مطابق اس وقت تقریباً 18 لاکھ پاکستانی متحدہ عرب امارات میں مقیم ہیں، جبکہ یو اے ای پاکستان کے لیے ترسیلاتِ زر کے بڑے ذرائع میں بھی شامل ہے۔ گزشتہ کئی ماہ سے پاکستانی شہریوں کو وزٹ ویزا حاصل کرنے میں تاخیر اور سخت جانچ پڑتال کا سامنا تھا، اگرچہ دونوں ممالک کی جانب سے بارہا یہ وضاحت کی گئی کہ پاکستانیوں پر کسی قسم کی باضابطہ ویزا پابندی نافذ نہیں کی گئی۔
ٹریول ایجنٹس ایسوسی ایشن آف پاکستان (TAAP) کے سابق چیئرمین اور اروما ٹریولز کے چیف ایگزیکٹو محمد ندیم شریف کا کہنا ہے کہ خاندان کے ساتھ سفر کرنے والے افراد اور یو اے ای میں رہنے والے اپنے رشتہ داروں سے ملنے جانے والے پاکستانیوں کے لیے وزٹ ویزا حاصل کرنا اب نسبتاً آسان ہو گیا ہے۔
انہوں نے مزید بتایا کہ حالیہ علاقائی کشیدگی کے باعث متاثر ہونے والی فضائی آپریشنز بھی بتدریج معمول پر آ رہے ہیں، جس سے سیاحتی شعبے میں دوبارہ سرگرمی بڑھنے کی توقع ہے۔
دوسری جانب پاکستانی امیگریشن کے ایک سینئر افسر کے مطابق دبئی جانے والے پاکستانی مسافروں کی تعداد میں بھی واضح اضافہ دیکھا گیا ہے۔ موسم گرما کے آغاز میں جہاں روزانہ تقریباً 170 افراد دبئی روانہ ہو رہے تھے، وہیں جولائی کے آخری ہفتے تک یہ تعداد بڑھ کر تقریباً 400 یومیہ تک پہنچ گئی۔ تاہم یہ سطح اب بھی دو برس قبل کے مقابلے میں کم ہے، جب روزانہ تقریباً ایک ہزار پاکستانی دبئی کا سفر کرتے تھے۔
یو اے ای سفارت خانے کے ایک اہلکار نے بھی اس پیش رفت کی تصدیق کرتے ہوئے بتایا کہ رجسٹرڈ ٹریول ایجنٹس کے ذریعے عام پاکستانی پاسپورٹ رکھنے والے شہریوں کو دوبارہ وزٹ ویزے جاری کیے جا رہے ہیں۔ ان کے مطابق ماضی میں سیکیورٹی خدشات کے پیش نظر جانچ کے عمل کو مزید سخت کیا گیا تھا، تاہم اب مکمل اور درست دستاویزات فراہم کرنے والے درخواست گزاروں کے لیے ویزا حاصل کرنا نسبتاً آسان بنا دیا گیا ہے۔
واضح رہے کہ گزشتہ سال پاکستان اور متحدہ عرب امارات نے ویزا نظام کو مزید مؤثر اور آسان بنانے پر اتفاق کیا تھا۔ وزارت خارجہ کے مطابق بعض درخواست گزاروں کی جانب سے جعلی تعلیمی اسناد، فرضی ملازمت کے معاہدے اور دیگر بے ضابطگیوں کے باعث اضافی تصدیقی عمل متعارف کرایا گیا تھا، جس کے بعد ویزا درخواستوں کی جانچ مزید سخت کر دی گئی تھی۔
