اسلام آباد (نیوز ڈیسک) وفاقی حکومت نے پیٹرولیم مصنوعات کی قیمتوں میں ایک مرتبہ پھر اضافہ کر دیا ہے۔

پیٹرولیم ڈویژن کی جانب سے 25 جولائی کے لیے جاری کردہ نوٹیفکیشن کے مطابق پیٹرول اور ہائی اسپیڈ ڈیزل دونوں کی فی لیٹر قیمت میں اضافہ کیا گیا ہے۔نوٹیفکیشن کے مطابق پیٹرول کی قیمت میں 3 روپے 66 پیسے فی لیٹر اضافہ کیا گیا ہے، جس کے بعد نئی قیمت 335 روپے 18 پیسے فی لیٹر مقرر کر دی گئی ہے۔اسی طرح ہائی اسپیڈ ڈیزل بھی 4 روپے 80 پیسے فی لیٹر مہنگا کر دیا گیا ہے، جس کے بعد اس کی نئی قیمت 383 روپے 46 پیسے فی لیٹر ہو گئی ہے۔یہ مسلسل دوسرے روز ہے کہ حکومت نے پیٹرولیم مصنوعات کی قیمتوں میں اضافہ کیا ہے۔

اس سے قبل جاری ہونے والے نوٹیفکیشن میں پیٹرول کی قیمت میں 4 روپے 40 پیسے جبکہ ڈیزل کی قیمت میں 3 روپے 62 پیسے فی لیٹر اضافہ کیا گیا تھا۔حالیہ اضافے کے بعد پیٹرول اور ڈیزل کی قیمتیں مزید بلند سطح پر پہنچ گئی ہیں، جس کے باعث ٹرانسپورٹ، اشیائے ضروریہ اور دیگر شعبوں میں اخراجات بڑھنے کا خدشہ ظاہر کیا جا رہا ہے۔