اسلام آباد (نیوز ڈ یسک) فیڈرل بورڈ آف ریونیو (ایف بی آر) نے اعلان کیا ہے کہ ادارے کا آن لائن نظام تکنیکی اپ گریڈیشن اور مین ٹیننس کے باعث 8 اگست سے 10 اگست 2026 تک جزوی طور پر بند رہے گا۔

ایف بی آر کے مطابق مین ٹیننس کا عمل 8 اگست رات 12:30 بجے شروع ہوگا اور 10 اگست صبح 5:00 بجے تک جاری رہے گا۔ اس دوران متعدد آن لائن خدمات عارضی طور پر دستیاب نہیں ہوں گی۔ادارے کا کہنا ہے کہ مین ٹیننس کے دوران آئی آر آئی ایس (IRIS) سسٹم، ڈیجیٹل انوائسنگ، آن لائن ادائیگیوں کا نظام اور دیگر متعلقہ سروسز معطل رہیں گی۔ اس کے علاوہ سویپس (SWAPS) اور پی او ایس رجسٹریشن کی سہولت بھی عارضی طور پر بند رہے گی، جس کے باعث صارفین ان خدمات سے استفادہ نہیں کر سکیں گے۔

ایف بی آر نے تمام ٹیکس دہندگان کو مشورہ دیا ہے کہ وہ اپنی ٹیکس ریٹرنز، ادائیگیاں، رجسٹریشن اور دیگر ضروری امور مقررہ مین ٹیننس سے پہلے مکمل کر لیں تاکہ کسی قسم کی دشواری سے بچا جا سکے۔ادارے نے یقین دہانی کرائی ہے کہ مین ٹیننس کا عمل مکمل ہوتے ہی تمام متاثرہ آن لائن سروسز دوبارہ بحال کر دی جائیں گی اور صارفین معمول کے مطابق انہیں استعمال کر سکیں گے۔