اسلام آباد (نیوز ڈیسک) خیبر پختونخوا حکومت نے سرکاری ملازمین کے لیے مالی سہولیات میں اضافہ کرتے ہوئے ہاؤس ریکوزیشن الاؤنس کی نئی شرحوں کی منظوری دے دی ہے۔

اس فیصلے کا باضابطہ نوٹیفکیشن محکمہ خزانہ کی جانب سے جاری کر دیا گیا ہے۔سرکاری اعلامیے کے مطابق یہ اضافہ سول سیکریٹریٹ، وزیراعلیٰ سیکریٹریٹ اور گورنر سیکریٹریٹ میں خدمات انجام دینے والے گریڈ 3 سے گریڈ 22 تک کے تمام ملازمین اور افسران پر لاگو ہوگا۔ نئی شرحوں کے تحت مختلف گریڈز کے ملازمین کو ان کے عہدوں کے مطابق ماہانہ الاؤنس فراہم کیا جائے گا۔نوٹیفکیشن میں بتایا گیا ہے کہ گریڈ 3 سے 6 تک کے ملازمین کو 6 ہزار روپے، گریڈ 7 سے 10 کو 9 ہزار روپے، گریڈ 11 سے 13 کے ملازمین کو 13 ہزار روپے جبکہ گریڈ 14 اور 15 کے لیے 16 ہزار روپے ماہانہ ہاؤس ریکوزیشن الاؤنس مقرر کیا گیا ہے۔

اسی طرح گریڈ 16 کے ملازمین کو 18 ہزار روپے، گریڈ 17 اور 18 کے افسران کو 21 ہزار روپے، گریڈ 19 کو 28 ہزار روپے، گریڈ 20 کو 35 ہزار روپے، گریڈ 21 کے افسران کو 42 ہزار روپے جبکہ گریڈ 22 کے افسران کو 52 ہزار روپے ماہانہ الاؤنس ادا کیا جائے گا۔محکمہ خزانہ نے واضح کیا ہے کہ نئی شرحوں کا اطلاق یکم جولائی 2026 سے مؤثر ہوگا۔دوسری جانب صوبائی حکومت نے خصوصی افراد کے لیے بھی اہم فیصلہ کرتے ہوئے معذور سرکاری ملازمین کے اسپیشل کنوینس الاؤنس میں اضافہ کر دیا ہے۔ جاری کردہ نوٹیفکیشن کے مطابق یہ الاؤنس 6 ہزار روپے سے بڑھا کر 10 ہزار روپے ماہانہ کر دیا گیا ہے، جبکہ اس فیصلے کا نفاذ بھی یکم جولائی 2026 سے عمل میں آ چکا ہے۔