اسلام آباد (نیوز ڈیسک )پاکستان آٹو موٹیو مینوفیکچررز ایسوسی ایشن (پاما) کی تازہ رپورٹ کے مطابق مالی سال 2025-26 کے دوران ملک میں آٹو موبائل انڈسٹری نے نمایاں ترقی کی،

جہاں مختلف اقسام کی گاڑیوں کی فروخت میں مجموعی طور پر 40 فیصد اضافہ ریکارڈ کیا گیا۔رپورٹ کے مطابق گزشتہ مالی سال میں ایک لاکھ 55 ہزار سے زائد کاریں فروخت ہوئیں، جو اس شعبے میں بحالی کے واضح آثار ہیں۔ جون کے مہینے میں بھی فروخت کا رجحان مثبت رہا اور مئی کے مقابلے میں کاروں کی فروخت 13 فیصد اضافے کے بعد 15 ہزار 378 یونٹس تک پہنچ گئی۔پاما کے اعداد و شمار کے مطابق ٹرکوں اور بسوں کی فروخت میں سب سے زیادہ اضافہ دیکھا گیا، جہاں گزشتہ مالی سال کے دوران فروخت 67 فیصد بڑھ کر 7 ہزار 440 یونٹس ریکارڈ کی گئی۔اسی عرصے میں جیپس اور پک اپ گاڑیوں کی فروخت بھی نمایاں رہی اور 41 فیصد اضافے کے بعد یہ تعداد 50 ہزار 814 یونٹس تک جا پہنچی۔

رپورٹ میں بتایا گیا ہے کہ موٹر سائیکلوں اور رکشوں کی مارکیٹ بھی مستحکم رہی۔ مالی سال کے دوران ان کی فروخت 30 فیصد بڑھ کر 19 لاکھ 72 ہزار 77 یونٹس تک پہنچ گئی۔معاشی ماہرین کے مطابق صارفین کی بہتر قوتِ خرید، آٹو فنانسنگ کی سہولیات میں بہتری اور نئی گاڑیوں کے ماڈلز کی دستیابی نے مارکیٹ میں طلب بڑھانے میں اہم کردار ادا کیا۔صنعتی حلقوں کا کہنا ہے کہ ملک میں تجارتی سرگرمیوں میں اضافے کے باعث کمرشل گاڑیوں کی مانگ بھی بڑھی، جس سے ٹرکوں اور دیگر کاروباری گاڑیوں کی فروخت میں نمایاں اضافہ دیکھنے میں آیا۔