اسلام آباد (نیوز ڈیسک): عالمی مارکیٹ میں خام تیل کی قیمتوں میں حالیہ تبدیلیوں کے باوجود امکان ظاہر کیا جا رہا ہے کہ آئندہ پندرہ روزہ جائزے میں پاکستان میں پیٹرول کی قیمتوں میں کوئی ردوبدل نہیں کیا جائے گا۔
معاشی ماہرین کے مطابق بین الاقوامی سطح پر خام تیل کی قیمتوں میں اتار چڑھاؤ ضرور دیکھنے میں آیا ہے، تاہم اس کی شدت فی الحال اتنی زیادہ نہیں کہ حکومت کو فوری طور پر پیٹرولیم مصنوعات کے نرخ تبدیل کرنے کی ضرورت پیش آئے۔
تجزیہ کاروں کا کہنا ہے کہ مشرق وسطیٰ کی کشیدہ صورتحال کے باعث عالمی منڈی میں قیمتیں وقتی طور پر متاثر ہوئیں، لیکن ہفتہ وار اوسط اب بھی ایسی سطح پر ہے جسے قابلِ برداشت قرار دیا جا رہا ہے۔
ماہرین کے مطابق اگر آئندہ چند روز کے دوران خام تیل کی قیمتوں میں غیر معمولی اضافہ نہیں ہوتا تو پاکستان میں بھی پیٹرول اور دیگر پٹرولیم مصنوعات کی موجودہ قیمتیں برقرار رہنے کا قوی امکان ہے۔
