اسلام آباد(این این آئی)وفاقی حکومت نے وزیراعظم اپنا گھر اسکیم تک عوام کی رسائی مزید آسان بنانے کیلئے اہم فیصلہ کرتے ہوئے نان بینکنگ فنانس کمپنیوں کو بھی پروگرام کا حصہ بنانے کی منظوری دے دی ہے۔
ذرائع کے مطابق روایتی بینک اکائونٹ نہ رکھنے والے بھی اپنا گھراسکیم کیلئے درخواست دے سکیں گے، وفاقی حکومت نے نان بینکنگ فنانس کمپنیوں کواسکیم کاحصہ بنانے کی منظوری دے دی۔ذرائع نے بتایاکہ ایس ای سی پی کے تحت نان بینکنگ ہاؤسنگ فنانس اورانویسٹمنٹ فنانس کمپنیاں اسکیم کے تحت ایک کروڑ روپے تک قرض فراہم کرسکیں گی،جبکہ مائیکروفنانس کمپنیاں مستحق افراد کو 50لاکھ روپے تک قرض دے سکیں گی۔اسکیم کے تحت قرض پہلے 10سال کے لیے صرف 5فیصد شرح منافع پردستیاب ہوگاتاکہ زیادہ سے زیادہ افراد اپنے گھر کا خواب پورا کر سکیں۔
ذرائع کے مطابق نان بینکنگ فنانس کمپنیوں کا نیٹ ورک ڈیجیٹل ذرائع کیساتھ ساتھ دور دراز اور پسماندہ علاقوں تک بھی موجود ہے،جس سے اسکیم کی رسائی میں نمایاں اضافہ ہوگا۔این بی ایف سیزسے ہاؤسنگ فنانس کیلیے فریم ورک جاری کردیاگیاہے،این بی ایف سیزبینکوں اور دیگر مالیاتی اداروں کے اشتراک سے بھی قرض فراہم کرسکیں گی۔
