اسلام آباد (نیوز ڈیسک) وفاقی حکومت نے نئے مالی سال کے آغاز پر عوام کو ریلیف دیتے ہوئے مائع پیٹرولیم گیس (ایل پی جی) کی قیمت میں نمایاں کمی کر دی ہے، جس کے بعد گھریلو صارفین کے لیے سلنڈر بھی سستا ہو گیا۔

نجی ٹی وی چینل کی رپورٹ کے مطابق آئل اینڈ گیس ریگولیٹری اتھارٹی (اوگرا) نے ایل پی جی کی نئی قیمتوں کا نوٹیفکیشن جاری کر دیا ہے۔ نوٹیفکیشن کے مطابق فی کلو ایل پی جی کی قیمت میں 67 روپے 33 پیسے کی کمی کی گئی ہے، جس کے بعد نئی سرکاری قیمت 241 روپے 43 پیسے فی کلو مقرر کر دی گئی ہے۔

اوگرا کے اعلامیے میں بتایا گیا ہے کہ قیمتوں میں کمی کے باعث 11.8 کلوگرام وزنی گھریلو ایل پی جی سلنڈر بھی 794 روپے 5 پیسے سستا ہو گیا ہے۔ نئی قیمت کے تحت یہ سلنڈر اب 2 ہزار 848 روپے 91 پیسے میں دستیاب ہوگا۔

حکام کا کہنا ہے کہ نئی قیمتوں کا اطلاق فوری طور پر ہوگا، جس سے گھریلو صارفین کو گیس کے اخراجات میں خاطر خواہ ریلیف ملنے کی توقع ہے۔