لاہور( این این آئی)صوبائی دارالحکومت میں ایک شہری کے نام 28 لاکھ روپے سے زائد مالیت کے ٹریفک چالان سامنے آنے پر حیران کن انکشافات ہوئے ہیں۔

ترجمان ٹریفک پولیس کے مطابق جمشید نامی شہری کے نام پر 1743 رکشے، موٹر سائیکلیں اور گاڑیاں رجسٹرڈ ہونے کا انکشاف ہوا ہے جن کے مجموعی طور پر 2295 ای چالان جاری کیے جا چکے ہیں۔ٹریفک پولیس کے مطابق ٹریفک قوانین کی خلاف ورزیوں کی مد میں 28 لاکھ 25 ہزار 700 روپے واجب الادا ہیں۔ترجمان کے مطابق ایک موٹر سائیکل سوار کو جنرل ہولڈ اپ کے دوران روک کر اس کی ملکیت کی جانچ پڑتال کی گئی جس کے بعد موٹر سائیکل کو قبضے میں لے کر تھانہ مسلم ٹائون میں بند کر دیا گیا۔ٹریفک پولیس کے مطابق معاملے کی سنگینی کے پیش نظر اصل مالک یا مالکان کی تلاش کے لیے سیف سٹی حکام کو بھی آگاہ کر دیا گیا ہے۔اس حوالے سے چیف ٹریفک آفیسر عبدالرحیم شیرازی کے مطابق ای چالان نادہندگان کے خلاف اب سخت کارروائی کی جا رہی ہے اور قانون کی خلاف ورزی کرنے والوں کو کسی قسم کی رعایت نہیں دی جائے گی۔